Sunday, Aug 25 2019 | Time 01:23 Hrs(IST)
International Share

ಜಪಾನ್ ಗೆ ಅಪ್ಪಳಿಸಲಿದೆ ಕ್ರೋಸಾ ಚಂಡಮಾರುತ!

ಟೊಕಿಯೋ, ಆಗಸ್ಟ್ 13 (ಯುಎನ್ಐ) ಕ್ರೋಸಾ ಎಂಬ ಪ್ರಬಲ ಚಂಡಮಾರುತವು ಜಪಾನ್ ಕಡೆಗೆ ಸಾಗುತ್ತಿದ್ದು, ಶೀಘ್ರದಲ್ಲಿಯೇ ಪಶ್ಚಿಮ ಜಪಾನ್ ತೀರವನ್ನು ಅಪ್ಪಳಿಸುವ ಸಾಧ್ಯತೆ ಇದೆ ಎಂದು
ಅಲ್ಲಿನ ಹವಾಮಾನ ಇಲಾಖೆ ಮಂಗಳವಾರ ಮಾಹಿತಿ ನೀಡಿದೆ.
ಬೇಸಿಗೆ ರಜಾದಿನಗಳನ್ನು ಮುಗಿಸಿ ಪ್ರವಾಸಿಗರು ಮರಳುವ ಸಮಯದಲ್ಲಿ ಕ್ರೋಸಾ ಚಂಡಮಾರುತ ಅಪ್ಪಳಿಸಲಿದ್ದು, ಅಗತ್ಯ ಮುನ್ನೇಚ್ಚರಿಕೆ ತೆಗೆದುಕೊಳ್ಳುವಂತೆ ಇಲಾಖೆ ಸೂಚಿಸಿದೆ.
ಚಂಡಮಾರುತ ಅಪ್ಪಳಿಸುವ ಸಾಧ್ಯತೆ ಇರುವುದರಿಂದ ಶಿಂಕಾಸೆನ್ ಬುಲೆಟ್ ರೈಲು ಸೇವೆಯನ್ನು ಗುರುವಾರ ಸಂಪೂರ್ಣವಾಗಿ ಸ್ಥಗಿತಗೊಳಿಸಬಹುದು ಎಂದು ಪಶ್ಚಿಮ ಜಪಾನ್ ರೈಲ್ವೆ ನಿಗಮ ತಿಳಿಸಿದೆ.
ಹವಾಮಾನ ವಿಭಾಗದ ಅನುಸಾರ, ಪ್ರಸ್ತುತ 10 ನೇ ಚಂಡಮಾರುತವು ದಕ್ಷಿಣ-ಪಶ್ಚಿಮ ತಾಂಗೇಶಿಮಾ ದ್ವೀಪದಿಂದ ಸುಮಾರು 500 ಕಿಲೋಮೀಟರ್ ದೂರದಲ್ಲಿದ್ದು, ಬುಧವಾರ ಮತ್ತು ಗುರುವಾರ ರಾಜ್ಯದ ಪಶ್ಚಿಮ ಪ್ರದೇಶಗಳಲ್ಲಿ ಹಾದುಹೋಗುವ ನಿರೀಕ್ಷೆ ಇದೆ.
ಸುದ್ದಿ ಸಂಸ್ಥೆ ವರದಿಯ ಪ್ರಕಾರ, ಚಂಡಮಾರುತದ ಪರಿಣಾಮ ಭಾರಿ ಮಳೆಯಾಗುವ ಸಾಧ್ಯತೆ ಇದ್ದು, ಜಪಾನ್‌ನ ಪಶ್ಚಿಮ ಮತ್ತು ಪೂರ್ವ ಪ್ರದೇಶಗಳಲ್ಲಿ ಭೂಕುಸಿತ, ಪ್ರವಾಹ ಮತ್ತು ನದಿಗಳ ನೀರಿನ ಮಟ್ಟ ಹೆಚ್ಚಾಗಬಹುದೆಂದು ಶಂಕಿಸಲಾಗಿದೆ.
ಸ್ಥಳೀಯ ಸರ್ಕಾರಿ ಅಧಿಕಾರಿಗಳ ಸಹಕಾರದೊಂದಿಗೆ ಸಚಿವಾಲಯಗಳ ಅಧಿಕಾರಿಗಳು ಕಾರ್ಯನಿರ್ವಹಿಸಬೇಕು ಎಂದು ವಿಪತ್ತು ನಿರ್ವಹಣಾ ಇಲಾಖೆಯ ಸಚಿವ ಜುನೋ ಯಾಮಾಮೋಟೊ ಸೂಚಿಸಿದ್ದಾರೆ.
ಯುಎನ್ಐ ಪಿಕೆ ಎಸ್ಎಚ್ 1920