Monday, Sep 23 2019 | Time 01:47 Hrs(IST)
  • ಇಂಡೋ-ಆಫ್ರಿಕಾ ಚುಟುಕು ಸರಣಿ ಸಮಬಲ
Sports Share

ಸಿಪಿಎಲ್‌: ಸೇಟ್‌ ಕಿಟ್ಸ್‌ ಮತ್ತು ನೆವಿಸ್‌ ಪ್ಯಾಟ್ರಿಯಟ್ಸ್ ತಂಡಕ್ಕೆ ದಾಖಲೆಯ ಜಯ

ಸೇಂಟ್‌ ಕಿಟ್ಸ್‌, ಸೆ 11 (ಯುಎನ್‌ಐ) ಸೇಂಟ್‌ ಕಿಟ್ಸ್‌ ಹಾಗೂ ನೆವಿಸ್‌ ಪ್ಯಾಟ್ರಿಯಟ್ಸ್‌ ತಂಡ ಇಲ್ಲಿ ನಡೆಯುತ್ತಿರುವ ಕೆರಿಬಿಯನ್‌ ಪ್ರೀಮಿಯರ್‌ ಲೀಗ್‌ನಲ್ಲಿ ಜಮೈಕಾ ತಲ್ಲವಾಹ್ಸ್‌ ವಿರುದ್ಧ 242 ರನ್‌ ದಾಖಲೆಯ ಜಯ ಸಾಧಿಸಿತು.
ಜಮೈಕಾ ತಲ್ಲವಾಹ್ಸ್‌ ನೀಡಿದ್ದ 242 ರನ್ ಕಠಿಣ ಗುರಿ ಹಿಂಬಾಲಿಸಿದ ಸೇಂಟ್‌ ಕಿಟ್ಸ್‌ ಹಾಗೂ ನೆವಿಸ್ ಪ್ಯಾಟ್ರಿಯಟ್ಸ್ ತಂಡ ಅತ್ಯತ್ತಮ ಪ್ರದರ್ಶನ ತೋರಿತು. 18.5 ಓವರ್‌ಗಳಲ್ಲಿ ಇನ್ನೂ ಏಳು ಎಸೆತಗಳು ಬಾಕಿ ಇರುವಂತೆ ಆರು ವಿಕೆಟ್‌ ಕಳೆದುಕೊಂಡು 242 ರನ್ ಗಳಿಸಿ ದಾಖಲೆಯ ಜಯ ಸಾಧಿಸಿತು.
ಸೇಂಟ್‌ ಕಿಟ್ಸ್‌ ಹಾಗೂ ಪ್ಯಾಟ್ರಿಯಟ್ಸ್‌ ಪರ ಆರಂಭಿಕರಾಗಿ ಕಣಕ್ಕೆ ಇಳಿದ ಡೆವೋನ್‌ ಥಾಮಸ್‌ ಹಾಗೂ ಎವಿನ್‌ ಲೆವಿಸ್‌ ಜೋಡಿ ಕೇವಲ 5.3 ಓವರ್‌ಗಳಲ್ಲಿ ಮುರಿಯದ ಮೊದಲನೇ ವಿಕೆಟ್‌ಗೆ 85 ರನ್‌ ಗಳಿಸಿ ತಂಡಕ್ಕೆ ಭರ್ಜರಿ ಅಡಿಪಾಯ ಹಾಕಿತು.
ಎವಿನ್‌ ಲೆವಿಸ್‌ ಕೇವಲ 18 ಎಸೆತಗಳಲ್ಲಿ ಆರು ಸಿಕ್ಸರ್‌ ಹಾಗೂ ಮೂರು ಬೌಂಡರಿಯೊಂದಿಗೆ 53 ರನ್‌ ಗಳಿಸಿ ಔಟ್‌ ಆದರು. ಮೂರನೇ ಕ್ರಮಾಂಕದಲ್ಲಿ ಲೌರಿ ಎವಾನ್ಸ್‌ 20 ಎಸೆತಗಳಲ್ಲಿ 41 ರನ್‌ ಗಳಿಸಿದರು. ಆರಂಭದಿಂದಲೂ ಭರ್ಜರಿ ಬ್ಯಾಟಿಂಗ್‌ ಮಾಡಿದ ಡೆವೋನ್‌ ಥಾಮಸ್ ಎದುರಿಸಿದ 40 ಎಸೆತಗಳಲ್ಲಿ ಮೂರು ಸಿಕ್ಸರ್‌ ಹಾಗೂ ಎಂಟು ಬೌಂಡರಿಯೊಂದಿಗೆ 71 ರನ್‌ ಗಳಿಸಿ ತಂಡವನ್ನು ಗೆಲುವಿನ ಸಮೀಪ ತಲುಪಿಸಿದರು. ನಂತರ ಮಧ್ಯಮ ಕ್ರಮಾಂಕದಲ್ಲಿ ಫ್ಯಾಬಿಯನ್‌ ಅಲ್ಲೆನ್‌ (ಔಟಾಗದೆ 37 ರನ್‌) ಹಾಗೂ ಶಮರಹ್‌ ಬ್ರೂಕ್ಸ್‌ (27 ರನ್‌) ಅವರ ತಂಡವನ್ನು ಗೆಲುವಿನ ದಡ ಸೇರಿಸುವ ಮೂಲಕ ತಮ್ಮ ಜವಾಬ್ದಾರಿ ಪೂರ್ಣಗೊಳಿಸಿದರು.
ಇದಕ್ಕೂ ಮುನ್ನ ಮೊದಲು ಬ್ಯಾಟಿಂಗ್‌ ಮಾಡಿದ ಜಮೈಕಾ ತಲ್ಲವಾಹ್ಸ್‌ ತಂಡ ನಿಗದಿತ 20 ಓವರ್‌ಗಳಲ್ಲಿ ನಾಲ್ಕು ವಿಕೆಟ್‌ ಕಳೆದುಕೊಂಡು 241 ರನ್‌ ಗಳಿಸಿತ್ತು.
ಗೇಲ್‌ ಶತಕ ವ್ಯರ್ಥ:
ಜಮೈಕಾ ತಲ್ಲವಾಹ್ಸ್‌ ಪರ ಆರಂಭಿಕರಾಗಿ ಕಣಕ್ಕೆ ಇಳಿದಿದ್ದ ಕ್ರಿಸ್‌ ಗೇಲ್‌ ಅಬ್ಬರದ ಬ್ಯಾಟಿಂಗ್‌ ಮಾಡಿದ್ದರು. 62 ಎಸೆತಗಳಲ್ಲಿ 10 ಸಿಕ್ಸರ್‌ ಹಾಗೂ ಏಳು ಬೌಂಡರಿಯೊಂದಿಗೆ 116 ರನ್‌ ಗಳಿಸಿ ನೆರೆದಿದ್ದ ಅಪಾರ ಅಭಿಮಾನಿಗಳನ್ನು ರಂಜಿಸಿದ್ದರು. ಮೂರನೇ ಕ್ರಮಾಂಕದಲ್ಲಿ ಅತ್ಯುತ್ತಮ ಬ್ಯಾಟಿಂಗ್‌ ಮಾಡಿದ್ದ ಚಾಡ್ವಿಕ್‌ ವಾಲ್ಟನ್‌ ಅವರು 36 ಎಸೆತಗಳಲ್ಲಿ ಎಂಟು ಸಿಕ್ಸರ್‌ ಹಾಗೂ ಮೂರು ಬೌಂಡರಿಯೊಂದಿಗೆ 73 ರನ್‌ ಗಳಿಸಿದ್ದರು. ಇವರಿಬ್ಬರು ಅತ್ಯುತ್ತಮ ಬ್ಯಾಟಿಂಗ್‌ ನೆರವಿನಿಂದ ಜಮೈಕಾ ತಂಡ 241 ರನ್‌ ಗಳಿಸಿತ್ತು.
ಸಂಕ್ಷಿಪ್ತ ಸ್ಕೋರ್‌
ಜಮೈಕಾ ತಲ್ಲವಾಹ್ಸ್‌: 20 ಓವರ್‌ಗಳಲ್ಲಿ 241/4 (ಕ್ರಿಸ್‌ ಗೇಲ್ 116, ಚಾಡ್ವಿಕ್‌ ವಾಲ್ಟನ್‌ 73; ಫ್ಯಾಬಿಯನ್‌ ಅಲ್ಲೆನ್‌ 30 ಕ್ಕೆ 2, ಅಲ್ಝಾರಿ ಜೊಸೆಫ್‌ 39 ಕ್ಕೆ 2)
ಸೇಂಟ್ ಕಿಟ್ಸ್: 18.5 ಓವರ್‌ಗಳಲ್ಲಿ 242/6 (ಡೆವೋನ್‌ ಥಾಮಸ್‌ 71, ಎವಿನ್ ಲೆವಿಸ್‌ 53, ಲೌರಿ ಎವಾನ್ಸ್‌ 41, ಫ್ಯಾಬಿಯನ್‌ ಔಟಾಗದೆ 37, ಶಮರಹ್‌ ಬ್ರೂಕ್ಸ್‌ 27; ಓಶಾನ್‌ ಥಾಮಸ್‌ 53 ಕ್ಕೆ 4, ಆ್ಯಂಡ್ರೆ ರಸೆಲ್‌ 54 ಕ್ಕೆ 2)
ಯುಎನ್‌ಐ ಆರ್‌ಕೆ ಎಎಚ್‌ 1108