Connect with us


      




ಕೃಷಿ

ಸಾಲಮನ್ನಾ ಮಾಡಿ   ರೈತರ ನೆರವಿಗೆ ಧಾವಿಸಿ

Kumara Raitha

Published

on

ಬೆಂಗಳೂರು: ಏಪ್ರಿಲ್‌ ೧೯ (ಯು.ಎನ್.‌ಐ.)  ಮಂಡ್ಯ ಜಿಲ್ಲೆಯ ರೈತರು ಸೇರಿದಂತೆ ರಾಜ್ಯದಲ್ಲಿ ಸಾಲಮನ್ನಾ ಆಗದೇ ಬಾಕಿ ಇರುವ ಲಕ್ಷಕ್ಕೂ ಹೆಚ್ಚು ರೈತರ ನೆರವಿಗೆ ಧಾವಿಸುವಂತೆ ಹಾಗೂ ಶೀಘ್ರ ಸಮಸ್ಯೆ ಬಗೆಹರಿಸುವಂತೆ ಸ್ಥಳೀಯ ಸಂಸ್ಥೆಗಳ ಮಂಡ್ಯ ಕ್ಷೇತ್ರದ ಶಾಸಕರಾದ ದಿನೇಶ್ ಗೂಳಿಗೌಡ ಅವರು ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಹಾಗೂ ಸಹಕಾರ ಸಚಿವ ಎಸ್.ಟಿ. ಸೋಮಶೇಖರ್ ಅವರಿಗೆ ಪತ್ರ ಬರೆದು ಕೋರಿದ್ದಾರೆ.

ಕೊರೋನಾ ಸಂಕಷ್ಟ ಕಾಲ, ಅತಿವೃಷ್ಟಿ, ಅನಾವೃಷ್ಟಿಗಳಂತಹ ಪ್ರಕೃತಿ ವಿಕೋಪಗಳಿಂದ ನಾಡಿನ ರೈತರು ಕಂಗಾಲಾಗಿದ್ದಾರೆ. ಅನ್ನದಾತ ಅಕ್ಷರಶಃ ಸಂಕಷ್ಟಕ್ಕೆ ಸಿಲುಕಿದ್ದಾನೆ. ಇಂತಹ ಸಂದಿಗ್ದ ಪರಿಸ್ಥಿತಿಯಲ್ಲಿ ದೇಶದ ಬೆನ್ನೆಲುಬಾಗಿರುವ ರೈತರ ನೆರವಿಗೆ ಸರ್ಕಾರ ಧಾವಿಸಬೇಕಾಗುತ್ತದೆ. ಆದರೆ, ಇನ್ನೂ ಮಂಡ್ಯ ಜಿಲ್ಲೆಯ ಬಹುಪಾಲು ರೈತರಿಗೆ ಸಾಲಮನ್ನಾದ ಪ್ರಯೋಜನ ಲಭ್ಯವಾಗಿಲ್ಲ. ಇದು ಕಳವಳಕಾರಿ ಸಂಗತಿಯಾಗಿದೆ. ರೈತರು ಮೊದಲೇ ಸಂಕಷ್ಟದಲ್ಲಿದ್ದು, ಇಂತಹ ಸಂದರ್ಭದಲ್ಲಿ ದಾಖಲೆಗಳ ನೆಪದಲ್ಲಿ ಅವರಿಗೆ ತೊಂದರೆಯಾಗುತ್ತಿರುವುದು ಸರಿಯಲ್ಲ ಎಂದು ಪತ್ರದಲ್ಲಿ ವಿವರಿಸಿದ್ದಾರೆ.

ಮಂಡ್ಯ ಜಿಲ್ಲೆಯೊಂದರಲ್ಲೇ ಸರ್ಕಾರದಿಂದ ಸಾಲಮನ್ನಾ ಅಸಲು ಬಿಡುಗಡೆಗೆ ಬಾಕಿ ಇರುವ ಮೂರು ಸಾವಿರಕ್ಕೂ ಹೆಚ್ಚು ರೈತರು ಇದ್ದಾರೆ. ಅಂದರೆ, 3021 ರೈತರಿಗೆ 15 ಕೋಟಿ 37 ಲಕ್ಷದ 45 ಸಾವಿರ ರೂಪಾಯಿ ಸಾಲಮನ್ನಾ ಹಣ ಬಿಡುಗಡೆಯಾಗಬೇಕಿದೆ. ಇವರಲ್ಲಿ ಸಮರ್ಪಕ ದಾಖಲಾತಿಗಳನ್ನು ಹೊಂದಿ ಹಸಿರು ಪಟ್ಟಿಯಲ್ಲಿರುವ ರೈತರು 2151 ಮಂದಿ ಇದ್ದು, ಇವರಿಗೆ 10 ಕೋಟಿ 86 ಲಕ್ಷದ 80 ಸಾವಿರ ರೂಪಾಯಿ ಸಾಲಮನ್ನಾ ಹಣ ಬಿಡುಗಡೆಯಾಗಬೇಕು. ಇದಲ್ಲದೆ, ಉಳಿತಾಯ ಖಾತೆ ತಪ್ಪಾಗಿರುವ 105 ರೈತರಿದ್ದು, 57.13 ಲಕ್ಷ ರೂಪಾಯಿ ಬಿಡುಗಡೆಗೆ ಬಾಕಿ ಹಾಗೂ 765 ರೈತರು ಹಸಿರು ಪಟ್ಟಿಗೆ ಬರಲು ಬಾಕಿ ಇದ್ದು, ಇವರಿಗೆ 3 ಕೋಟಿ 93 ಲಕ್ಷದ 52 ಸಾವಿರ ರೂಪಾಯಿ ಬಿಡುಗಡೆಯಾಗಬೇಕಿದೆ ಎಂದು ಪತ್ರದಲ್ಲಿ ವಿವರಿಸಿದ್ದಾರೆ.

ಈ ನಿಟ್ಟಿನಲ್ಲಿ ಸರ್ಕಾರವು ರೈತರ ಹಿತದೃಷ್ಟಿಯನ್ನು ಗಮನದಲ್ಲಿ ಇಟ್ಟುಕೊಂಡು ಕೂಡಲೇ ಹಸಿರು ಪಟ್ಟಿಯಲ್ಲಿರುವ, ಹಸಿರು ಪಟ್ಟಿಗೆ ಒಳಪಡುವ ಹಾಗೂ ಉಳಿತಾಯ ಖಾತೆ ತಪ್ಪಾಗಿರುವ ಪ್ರಕರಣಗಳನ್ನೂ ಸಹ ಪರಿಗಣನೆಗೆ ತೆಗೆದುಕೊಂಡು ಒಟ್ಟಾರೆ 3021 ರೈತರಿಗೆ 15 ಕೋಟಿ 37 ಲಕ್ಷದ 45 ಸಾವಿರ ರೂಪಾಯಿ ಸಾಲಮನ್ನಾ ಹಣವನ್ನು ಬಿಡುಗಡೆ ಮಾಡಬೇಕೆಂದು ಮಂಡ್ಯ ಜಿಲ್ಲೆಯ ಹಾಗೂ ರಾಜ್ಯದ ರೈತ ಬಾಂಧವರ ಪರವಾಗಿ ಶಾಸಕ ದಿನೇಶ್ ಗೂಳಿಗೌಡ ಅವರು ಕೋರಿದ್ದಾರೆ.

4 ವರ್ಷಗಳಿಂದ ಸಿಗುತ್ತಿಲ್ಲ ಸಾಲ – ರಾಜ್ಯದ ಲಕ್ಷ ಜನರಿಗೆ ತೊಂದರೆ
2018ರಲ್ಲಿ ರಾಜ್ಯ ಸರ್ಕಾರವು ರೈತರ ಸಾಲಮನ್ನಾವನ್ನು ಘೋಷಿಸಿತು. ಕೊನೆಗೆ ಸಾಕಷ್ಟು ಷರತ್ತುಗಳನ್ನು ವಹಿಸಿದ್ದರಿಂದ ದಾಖಲೆಗಳನ್ನು ನೀಡುವಲ್ಲಿ ಬಹಳಷ್ಟು ರೈತರು ವಿಫಲರಾಗಿದ್ದರೆ, ಮತ್ತೆ ಕೆಲವು ರೈತರಿಗೆ ತಾಂತ್ರಿಕ ಕಾರಣಗಳಿಂದ ಸಮಸ್ಯೆಗಳಾಯಿತು. ಆದರೆ, ಇದು ನಿರಂತರವಾಗಿ 4 ವರ್ಷಗಳ ಕಾಲ ಅಂದರೆ 2022-23ನೇ ಆರ್ಥಿಕ ವರ್ಷದಲ್ಲೂ ರೈತರಿಗೆ ಸಮಸ್ಯೆಯನ್ನು ತಂದೊಡ್ಡಿದೆ. ಅಂದರೆ, ಮಂಡ್ಯ ಜಿಲ್ಲೆಯಲ್ಲಿ ಈಗ ಸಾಲಮನ್ನಾದ ಪ್ರಯೋಜನ ಪಡೆಯಲಾಗದೇ ಸಿಲುಕಿರುವ 3021 ರೈತರಿಗೆ ಹೊಸ ಸಾಲ ಸಿಗುತ್ತಿಲ್ಲ. ಅಲ್ಲದೆ, ಹಳೆಯ ಸಾಲದ ರಿನ್ಯೂವಲ್ ಕೂಡಾ ಆಗದೆ ರೈತರು ಸಮಸ್ಯೆಗೆ ಸಿಲುಕಿದ್ದಾರೆ. ಇದು ಮಂಡ್ಯ ಜಿಲ್ಲೆಯ ರೈತರ ಸಮಸ್ಯೆ ಮಾತ್ರವಲ್ಲ. ಇಡೀ ರಾಜ್ಯದಲ್ಲಿ ಸಾಲಮನ್ನಾ ಪ್ರಯೋಜನ ಸಿಗದ ಸುಮಾರು 1 ಲಕ್ಷಕ್ಕೂ ಹೆಚ್ಚು ರೈತರು ಈ ಸಮಸ್ಯೆಯನ್ನು ಎದುರಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಮಾನ್ಯ ಮುಖ್ಯಮಂತ್ರಿಯವರು ಕೂಡಲೇ ಸಹಕಾರ ಸಚಿವರು ಸೇರಿದಂತೆ ಸಂಬಂಧಪಟ್ಟ ಅಧಿಕಾರಿಗಳ ಜೊತೆ ಸಭೆ ನಡೆಸಿ, ವಿಳಂಬವಾಗುತ್ತಿರುವ ಬಗ್ಗೆ ಕಾರಣವನ್ನು ತಿಳಿದುಕೊಳ್ಳುವುದರ ಜೊತೆಗೆ ಸಂಕಷ್ಟದಲ್ಲಿರುವ ರೈತರ ನೆರವಿಗೆ ದಾವಿಸಬೇಕೆಂದು ಶಾಸಕರಾದ ದಿನೇಶ್ ಗೂಳಿಗೌಡ ಅವರು ಪತ್ರದ ಮುಖೇನ ಕೋರಿದ್ದಾರೆ.

Share