ಶಾಂಘೈ: ಚೀನಾದ ಪೂರ್ವ ಝೆಜಿಯಾಂಗ್ ಪ್ರಾಂತ್ಯದಲ್ಲಿ ಕೋವಿಡ್‌ ಪ್ರಕರಣಗಳ ಏರಿಕೆಯಿಂದಾಗಿ ಸರ್ಕಾರ ಕೋವಿಡ್‌ ನಿರ್ಬಂಧಗಳನ್ನು ಬಿಗಿಗೊಳಿಸಿರುವುದರಿಂದಾಗಿ ಹಲವು ಕಂಪನಿಗಳು ಉತ್ಪಾದನೆಯನ್ನು ಸ್ಥಗಿತಗೊಳಿಸುವುದಾಗಿ ಸೋಮವಾರ ತಿಳಿಸಿವೆ.

ದಿನದ ಆರಂಭಿಕ ವಹಿವಾಟಿನಲ್ಲಿ ಈ ಕಂಪನಿಗಳ ಷೇರು ಮೌಲ್ಯಗಳು ತೀವ್ರ ಕುಸಿತಕಂಡಿವೆ.

ಝೆಜಿಯಾಂಗ್‌ ಪ್ರಾಂತ್ಯದಲ್ಲಿ ಡಿಸೆಂಬರ್‌ 6 ರಿಂದ 12ರ ಅವಧಿಯಲ್ಲಿ ಒಟ್ಟು 173 ಪ್ರಕರಣಗಳು ವರದಿಯಾಗಿವೆ. ಅಕ್ಟೋಬರ್‌ ತಿಂಗಳಲ್ಲಿ ಈ ಪ್ರಾಂತ್ಯದಲ್ಲಿ ಕೇವಲ ಒಂದು ಪ್ರಕರಣ ವರದಿಯಾಗಿತ್ತು.

ಸ್ಥಳೀಯ ಸರ್ಕಾರದ ಕೋವಿಡ್‌ ನಿರ್ಬಂಧಗಳಿಂದಾಗಿ ಝೆಜಿಯಾಂಗ್‌ ನಗರದಲ್ಲಿನ ತನ್ನ ಅಂಗಸಂಸ್ಥೆಯು ಉತ್ಪಾದನೆಯನ್ನು ಸ್ಥಗಿತಗೊಳಿಸಿದೆ ಎಂದು ಚೀನಾದ ಝೆಜಿಯಾಂಗ್ ಜಿಂದುನ್ ಫ್ಯಾನ್ಸ್ ಕಂಪನಿ ತಿಳಿಸಿದೆ.

ಉತ್ಪನ್ನಗಳ ವಿತರಣೆಯಲ್ಲಿ ವಿಳಂಬವಾಗಲಿದ್ದು, ಈ ತಿಂಗಳು ವ್ಯವಹಾರಕ್ಕೆ ತೊಡಕು ಉಂಟಾಗಲಿದೆ. ಆದರೆ, ಈ ವರ್ಷದ ವಾರ್ಷಿಕ ಫಲಿತಾಂಶಗಳ ಮೇಲಿನ ಕುಸಿತವು ಸೀಮಿತವಾಗಿರುತ್ತದೆ ಎಂದೂ ಕಂಪನಿ ತಿಳಿಸಿದೆ.