ಮುಂಬೈ: ಜನವರಿ 03(ಯು.ಎನ್.ಐ) ಎನ್‍ಸಿಬಿ ಅಧಿಕಾರಿ ಸಮೀರ್ ವಾಂಖೆಡೆ ವಿರುದ್ಧ ಮಹಾರಾಷ್ಟ್ರ ಸಚಿವ ಮತ್ತು ನ್ಯಾಶನಲಿಸ್ಟ್ ಕಾಂಗ್ರೆಸ್ ಪಕ್ಷದ (ಎನ್‍ಸಿಪಿ) ನಾಯಕ ನವಾಬ್ ಮಲಿಕ್ ಸೋಮವಾರ ಕೇಂದ್ರೀಯ ಪರೋಕ್ಷ ತೆರಿಗೆ ಮತ್ತು ಕಸ್ಟಮ್ಸ್ ಮಂಡಳಿಯ (ಸಿಬಿಐಟಿ) ವಿಜಿಲೆನ್ಸ್ ವಿಭಾಗಕ್ಕೆ ದೂರು ನೀಡಿದ್ದಾರೆ.

ಸಮೀರ್ ವಾಂಖೆಡೆ 1997 ರಿಂದ ಇಲ್ಲಿಯವರೆಗೆ ಪರ್ಮಿಟ್ ರೂಮ್ ಮತ್ತು ಬಾರ್ ಲೈಸೆನ್ಸ್ ಹೊಂದಿದ್ದಾರೆ ಎಂದು ಆರೋಪಿಸಿದ್ದಾರೆ.

ವಾಂಖೆಡೆ 29 ಅಕ್ಟೋಬರ್ 1997ರಿಂದ ಇಲ್ಲಿಯವರೆಗೆ ಅವರ ಹೆಸರಿನಲ್ಲಿ ಪರ್ಮಿಟ್ ರೂಮ್ ಮತ್ತು ಬಾರ್ ಪರವಾನಗಿಯನ್ನು ಹೊಂದಿದ್ದಾರೆ. ಕೇಂದ್ರ ಸರ್ಕಾರಿ ನೌಕರನು ಅವರ ಹೆಸರಿನಲ್ಲಿಯೇ ಪರ್ಮಿಟ್ ರೂಮ್ ಮತ್ತು ಬಾರ್ ಲೈಸೆನ್ಸ್ ಅನ್ನು ಪಡೆದುಕೊಳ್ಳಲು ಮತ್ತು ನಿರ್ವಹಿಸಲು ಅರ್ಹರೇ? ದಯವಿಟ್ಟು ವಾಸ್ತವಾಂಶಗಳನ್ನು, ಆಡಳಿತಾತ್ಮಕ ದುಷ್ಕೃತ್ಯಗಳನ್ನು ಗಮನಿಸಿ ಮತ್ತು ಈ ವಿಷಯದಲ್ಲಿ ಸರಿಯಾದ ವಿಚಾರಣೆಯನ್ನು ನಡೆಸಿ ಎಂದು ಹೇಳಿದ್ದಾರೆ.

ಕಳೆದ ವರ್ಷ ಡಿಸೆಂಬರ್ 31 ರಂದು ಕೊನೆಗೊಂಡ ತನ್ನ ಅಧಿಕಾರಾವಧಿಯ ಮತ್ತಷ್ಟು ವಿಸ್ತರಣೆಗಾಗಿ ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್‍ಸಿಬಿ) ವಲಯ ನಿರ್ದೇಶಕ ಸಮೀರ್ ವಾಂಖೆಡೆಗೆ ಮಹಾರಾಷ್ಟ್ರದ ಕೆಲವು ಪ್ರಭಾವಿ ಬಿಜೆಪಿ ನಾಯಕರು ಲಾಬಿ ಮಾಡುತ್ತಿದ್ದಾರೆ ಎಂದು ನವಾಬ್ ಮಲಿಕ್ ಭಾನುವಾರದಂದು ಆರೋಪಿಸಿದ್ದರು.

ಎನ್‍ಸಿಬಿ ಅಧಿಕಾರಿ ಸತತವಾಗಿ ಬಹಿರಂಗಪಡಿಸಿದರೂ ತನ್ನ ಅಕ್ರಮಗಳನ್ನು ಮುಂದುವರಿಸಿದ್ದಾರೆ ಮತ್ತು ಅವರು ಇನ್ನೂ ಅಮಾಯಕರನ್ನು ಬಲೆಗೆ ಬೀಳಿಸಲು ಪ್ರಯತ್ನಿಸುತ್ತಿದ್ದಾರೆ ಎಂದು ಅವರು ಆರೋಪಿಸಿದರು.