ಬೆಂಗಳೂರು:  ಡಿಸೆಂಬರ್ (ಯು.ಎನ್.ಐ) ಮುಂದಿನ ಸಾರ್ವತ್ರಿಕ ವಿಧಾನಸಭಾ ಚುನಾವಣೆಗೆ ಮುನ್ನುಡಿಯೆಂತಲೇ ಬಿಂಬಿತವಾಗಿದ್ದ ಪ್ರತಿಷ್ಠೆಯ ಮೇಲ್ಮನೆ ಚುನಾವಣೆಯಲ್ಲಿ ಒಂದು ಸ್ಥಾನದ ಅಂತರದಿಂದ ಕೈ-ಕಮಲ ಹೆಚ್ಚಿನ ಬಲ-ಬೆಂಬಲಕ್ಕೆ ನಿರೀಕ್ಷಿಸುವಂತಾಗಿದೆ.
ವಿಧಾನಪರಿಷತ್ತಿನಲ್ಲಿ ಈ ಬಾರಿ ಅತಿಮುಖ್ಯವಾದ ವಿಧೇಯಕಗಳು ಜಾರಿಯಾಗಲು ಬಹುಮತ ಮುಖ್ಯ. ಹೀಗಾಗಿ ವಿಧೇಯಕ ಜಾರಿಗೂ ಮುನ್ನ ಬಹುಮತ, ಬಿಜೆಪಿಗೆ ಅವಶ್ಯಕವಿದ್ದರೆ ಸಮರ್ಥವಾಗಿ  ವಿರೋಧಿಸಲು ಕಾಂಗ್ರೆಸ್‌ಗೆ ಅವಶ್ಯಕವಾಗಿದೆ.
ಒಟ್ಟು 75 ಸ್ಥಾನಗಳ ಮೇಲ್ಮನೆಯಲ್ಲಿ 25 ಸ್ಥಾನಗಳಿಗೆ ಈಚೆಗೆ ನಡೆದ ಪರಿಷತ್ ಚುನಾವಣೆಯಲ್ಲಿ 11 ಸ್ಥಾನ ಗೆದ್ದ ಬಿಜೆಪಿ ಮೇಲ್ಮನೆಯಲ್ಲಿ ಹೊಂದಿರುವ ಸದಸ್ಯರ ಸಂಖ್ಯೆ 37ಕ್ಕೆ ಏರಿಕೆಯಾಗಿದೆ. ಸರಳ ಬಹುಮತಕ್ಕೆ ಕೇವಲ ಒಂದು ಸ್ಥಾನ ಕಡಿಮೆಯಾಗಿದೆ. ಕಾಂಗ್ರೆಸ್ ಬಲ 26ಕ್ಕೆ ವೃದ್ಧಿಸಿದೆ. ಜೆಡಿಎಸ್ 11 ಸದಸ್ಯರನ್ನು ಹೊಂದಿದೆ. ಪಕ್ಷೇತರ ಸದಸ್ಯ ಎಂದು ಇರುವುದು ಲಖನ್ ಜಾರಕಿಹೊಳಿ ಮಾತ್ರ.
ಕಾಂಗ್ರೆಸ್ ಮೂರು ಸ್ಥಾನ ಕಳೆದುಕೊಂಡರೆ ಜೆಡಿಎಸ್​ಗೆ ಎರಡು ಸ್ಥಾನಗಳು ನಷ್ಟವಾಗಿದೆ.ರಮೇಶ್ ಜಾರಕಿಹೊಳಿ ವತಿಯಿಂದ ಕಣಕ್ಕಿಳಿದು ಗೆದ್ದಿರುವ ಲಖನ್ ಜಾರಕಿಹೊಳಿ ಬೆಂಬಲ ಸಿಕ್ಕರೆ ಬಿಜೆಪಿಗೆ ಬಹುಮತ ದೊರೆಯುತ್ತದೆ ಎನ್ನಲಾಗಿದೆ. ಹೀಗೆ ಲಖನ್ ಬೆಂಬಲಕ್ಕೆ ಎರಡೂ ಕಡೆ ಪೈಪೋಟಿ ಇದೆ. ಒಂದುವೇಳೆ ಲಖನ್ ಬಿಜೆಪಿಗೆ ಬೆಂಬಲಿಸಬೇಕು ಎನ್ನುವುದಾದರೆ ಇದಕ್ಕಾಗಿ ಒಂದು ಸಚಿವ ಸ್ಥಾನದ ಬೇಡಿಕೆಯ ಷರತ್ತು ಬಿಜೆಪಿ ನಾಯಕರ ಮುಂದೆ ಹೋಗುವ ಸಾಧ್ಯತೆಯಿದೆ.
ಹಿಂದೆ ಮೇಲ್ಮನೆಯಲ್ಲಿ ಜೆಡಿಎಸ್-ಬಿಜೆಪಿ ಹೊಂದಾಣಿಕೆ ಮಾಡಿಕೊಂಡಿದ್ದರಿಂದ ಸಭಾಪತಿ ಸ್ಥಾನ ಜೆಡಿಎಸ್‌ಗೂ ಉಪಸಭಾಪತಿ ಸ್ಥಾನ ಬಿಜೆಪಿಗೂ ಹೋಗಿತ್ತು ಎಂಬುದಿಲ್ಲಿ ಗಮನಾರ್ಹ. ಜೆಡಿಎಸ್ ಸದಸ್ಯ ಭೋಜೇಗೌಡ ಯಾವುದಾದರೊಂದು ಪಕ್ಷಕ್ಕೆ ಬೆಂಬಲ ಸೂಚಿಸಲೇಬೇಕೆಂದಿದ್ದಾರೆ. ಮೂಲವೊಂದರ ಪ್ರಕಾರ ಜೆಡಿಎಸ್ ಮೇಲ್ಮನೆಯಲ್ಲಿ ಬಿಜೆಪಿಯನ್ನೇ ಬೆಂಬಲಿಸಲಿದೆ ಎನ್ನಲಾಗಿದೆ.